Jógvan Horn

"Eg spæli Bridge, tí tað er stuttligt! Ein partur av tí stuttliga er, at Bridge er eitt makkaraspæl. Tí ræður um at vera á bylgjulong við makkaran í øllum fasum í spælinum. Ein annar partur av tí stuttliga er, at hóast Bridge hevur eitt ómetaligt dýpi, ber til at hava tað stuttligt longu, tá man hevur lært seg tað mest grundleggjandi - og so leggja meira aftrat, so hvørt sum forvitnið veksur. Líka sum tað var stuttligt at byrja við at svimja í grunna endanum í svimjihylinum Hetta er fjórði veturin, har eg spæli Bridge, og eg vildi ynskt, at eg var byrjaður nógv fyrr."

Birita Clementsen

"Mær hevur altíð dámað væl at spæla kort. Vit spældu nógv kort sum børn og ung. Vit spældu ikki Bridge, men serliga Sjavs og Amerikano. Hetta gjørdi eg eisini saman við vinkonuni Elsebeth, sum nú er mín makkari. Hon segði tíbetur beinanvegin ja, tá eg í summar 2020 spurdi hana, um vit skuldu fara at læra okkum at spæla Bridge. Tað eru minst 20 ár síðan, eg fyrstu ferð hugsaði at melda meg til Bridge – og tað harmar meg í roynd og veru, at eg ikki gjørdi tað tá, tí eg havi hetta hálva árið fingið eina fatan av, hvussu nógv er at royna og læra. Men hinvegin er tað ikki minni stuttligt fyri tí, og eg fari líka spent til undirvísing og kapping hvørja einastu ferð. Bæði fyri at læra og vinna!"

Súni Poulsen

"Eg eri pensioneraður verkfrøðingur og seinasta arbeiðið var á Landsverki. Í 80 árunum spældi eg Bridge einar tveir vetrar, tá eg búði uttanlands. Spælið datt tó niðurfyri, tá eg flutti heim. Áhugin fyri Bridge var har, men tað tók sína tíð at fáa í lag at byrja aftur. Bridgeskúlin var júst tað rætta fyri meg til at koma í gongd aftur. Eg má siga, at Bridgefelagið veruliga hevur spílað seg út við hesum tiltakinum. Frálæran hevur verið væl skipað við nógvum spæli. Fleiri royndir bridgespælarar eru møttir mánakvøldini at spæla saman við okkum. Tað hevur eisini givið nógv, og samstundis hava hesir tryggjað, at øll borðini hava verið fullmannaði. Samanumtikið ein sera góð uppliving hesa vetrarhálvuna. Motivatiónin fyri at halda fram við hesum frálíka kortspælinum er størri nú, enn tá vit byrjaðu skúlan í heyst."

Anna Paulina Leo Olsen

"Tað einasta negativa við at læra seg Bridge er, at øll onnur kortspøl blíva sum at spæla Svartaper! Hinvegin havi eg ongum møtt enn, sum angraði, at hann/hon lærdi seg Bridge. Tað er bara at loypa í tað!"

Mortan Rasmussen

"Átti at verið byrjaður fyrr, men fór at spæla Bridge sum 27 ára gamal, og nú havi eg verið limur í bridgefelag í 53 ár. Bert spell, at eg ikki kendi Bridge fyrr enn tá - í 1967. Nú er gaman í - bridgeundirvísing hvørt mánakvøld."

Jóhanna Elisabeth Dam

”Mamma mín, Súsanna Dam, spældi Bridge. Tá ið vinkonan, Oluffa, spurdi meg, um eg tímdi at koma við henni í bridgeskúlan, segði eg beinanvegin ja, og tað angri eg ikki, tí tað er bæði spennandi og stuttlig at spæla Bridge.”

Erhard Jacobsen

”Bridge er eitt undirhaldandi og eitt sindur krevjandi spæl, sum tað ber til at blíva betur til alla tíðina.”

Ingun Joensen

”Mær dámar væl at spæla kort, og Bridge er eitt sindur meira avbjóðandi enn nógv onnur kortspøl.”

Diana Magnusdóttir

”Eg havi spælt tveir vetrar. Mær dámar væl at spæla kort, helt eg skuldi royna Bridge. Tað eri eg glað fyri nú, tí tað er bæði mennandi og sosialt at spæla. Tú lærir eitt sindur í senn, ikki alt í senn.”

Herálvur Jacobsen

”Eg byrjaði at spæla Bridge seinasta vetur og bleiv bitin av spælinum beinanvegin. Mann lærir okkurt alla tíðina.”

Oluffa undir Kletti

”Eg byrjaði í bridgeskúla heystið 2019. Tað er sera stuttligt og avbjóðandi at spæla Bridge, og tað blívur tað við at vera, tí tað er altíð okkurt meira, sum tú kanst læra og blíva betri til.”