Norðurlandameistarakappingin fyri lið verður leikt í Kuopio í Finnlandi í døgunum 26-29. mai 2022.
FBS hevur tikið avgerð um at senda eitt landslið til hesa Norðurlandameistarakappingina.
Væntandi koma 3 pør at manna landsliðið til hesa kapping – tó er endalig støða enn ikki tikin hesum viðvíkjandi.
Umframt altjóða royndir og úrslit í heimligu kappingunum, leggur FBS í sambandi við úttøkuna dent á at talan er um pør ið hava spælt saman gjøgnum eitt tíðarskeið, og sum hava spælt regluliga – bæði í feløgum og í teimum kappingum, ið FBS hevur fyriskipa.
Roknast skal við, at tey pør ið vísa áhuga fyri at manna landsliðið til hesa kapping, koma at venja regluliga á RealBridge og/ella BBO umleið tvær ferðir um vikuna, í tíðarskeiðnum fram til kappingarbyrjan.
FBS vil við hesum heita á pør, sum hava áhuga í at manna landsliðið til Norðurlandameistarakappingina í Finnlandi í døgunum 26-29. mai 2022 um at boðað FBS frá við at senda teldupost til bridge@bridge.fo í seinasta lagi mikudagin 30. mars 2022.